سياسة الخصوصية

مين نحنا

وصلة خدمة مجانية لصفحات الروابط، بتشغّلها شركة إيجاد للحلول (Ejad Solutions)، دمشق، سوريا.

شو منجمع منك كصاحب صفحة

• إيميلك، لتسجيل الدخول وإرسال رمز الدخول. وإذا دخلت بحساب Google، منستلم منه اسمك وإيميلك ومعرّف حسابك عند Google، لنعرفك بالمرة الجاية.
• اسمك، ونوع شغلك ومحافظتك، ورقم هاتفك إذا كتبته (اختياري).
• محتوى صفحتك: الاسم والنبذة والشعار والروابط والأرقام. هاد المحتوى عام لأنك أنت بتنشره.
• موافقتك على الشروط، واختيارك إذا بدك رسائل عن وصلة (اختياري، وبتقدر تلغيه من الإعدادات).

زوار صفحتك

منعدّ بس أرقام مجمّعة: كم مرة انفتحت الصفحة باليوم، وكم مرة انكبس كل رابط.

ما منخزّن عنوان IP ولا نوع الجهاز أو المتصفح، وما منحط كوكيز على الصفحات العامة، وما في سكربتات تحليلات أو إعلانات.

الكوكيز على موقع وصلة

منستعمل كوكي واحدة لتبقى داخل لما تسجّل دخول، وكوكي لتذكّر اللغة يلي اخترتها. ما في كوكيز إعلانية.

البلاغات

إذا بلّغت عن صفحة، منحفظ السبب والتفاصيل، ووسيلة التواصل إذا كتبتها، لنراجع البلاغ ونتصرف.

ومنحفظ رمز مشفّر باتجاه واحد، معمول من عنوان اتصالك ومن الصفحة يلي بلّغت عنها، بس لنعدّ كم شخص مختلف بلّغ عنها. ما منربطه أبداً بالزيارات ولا بصفحات تانية.

شو ما منعمل

• ما منبيع بياناتك.
• ما منشاركها مع حدا لأغراض إعلانية أو تجارية.
• ما منتتبّع زوارك من موقع لموقع.

حذف حسابك

من الإعدادات بتقدر تحذف حسابك بأي وقت. الحذف بيمسح صفحتك وروابطك وإحصاءاتها وشعارك.

القانون ومكان البيانات

منشتغل لنلتزم بالقانون رقم ١٢ لعام ٢٠٢٤ الخاص بحماية البيانات الشخصية في سوريا. مطابقة هالسياسة للقانون قيد المراجعة القانونية.

مكان استضافة البيانات ونقلها خارج سوريا، إن وُجد، رح نحدده مع المحامي ونكتبه هون قبل الإطلاق.